Top-20 para Miriam Casillas en Gold Coast

Miriam Casillas confirmou que pode competir ante as mellores triatletas do mundo ao ser 19ª nas Series Mundiais de Gold Coast. A natación da internacional do Triatlón Ferrol permitiulle rodar nun segundo grupo no que se atopaba a actual campioa do mundo Gwen Jorgensen. Tras o ciclismo, Miriam Casillas saíu correr entre as 35 mellores e foi rexurdindo até cruzar a meta en 19º lugar e como segunda mellor española, ao ser 13ª Ainhoa Murua e ter que abandonar Carolina Routier. “En bici non me encontraba moi ben pero mantívenme no grupo. Correndo atopábame fatal pero pouco a pouco fun respondendo e na última volta recuperei e remontei un montón”, valora Miriam Casillas. Desta forma, a triatleta extremeña consigue igualar o seu mellor resultado en campionato do mundo con outro 19ª posto, ao igual que nas Series Mundiais de Auckland en 2015. Ese resultado serviralle, no momento de contabilizar as probas puntuables na clasificación olímpica, para descartar resultados que dean menos puntos. As Series Mundiais de Gold Coast celebráronse sobre distancia olímpica de 1.500 m de natación, 40 km de bici e 10 km a pé.