08.09.2018
Marcos Ruiz logrou en Combarro o subcampionato galego de ácuatlon por segundo ano consecutivo.
O canteirán do Triatlón Ferrol rematou os 1.000 de natación no quinteto de cabeza e foi o único que lle puido seguir a estela ao líder da proba, marcando o terceiro mellor parcial a pé no 5.000 final.
Detrás do triatleta de Fene, Pablo Pedrosa rematou en 19ª posición e Borja Catrufo, 25º.
Nas categorías de base, a Escola Javi Gómez Noya sumou seis podios cos ouros da benxamín Lucía Villarnovo e o infantil Alejandro Rodríguez, as pratas do benxamín André Ordiales, a alevín Lucía Piñón e da infantil Sabela Caneiro e o bronce da cadete Carmen Jiménez.
02.09.2018
Miriam Casillas non puido terminar a Copa do Mundo de Karlovy Vary ao atoparse cunha deda inchada que lle impediu correr.
A pacense do Triatlón Ferrol nadou entre as mellores da proba checa e xa nos quilómetros iniciais do ciclismo, rodando no pelotón de cabeza, chegou o primeiro contratempo. A alemá Lindermann caeu xusto diante de Miriam Casillas, arrastrando a estremeña aínda que puido poñerse en pé rapidamente para enganchar de novo coas líderes.
Ao chegar á segunda transición, entre unha ducia de triatletas, Miriam Casillas tivo problemas para poñerse as zapatillas e ás poucas zancadas deuse de conta de que non sentía unha deda. A olímpica de Badaxoz tivo que retirarse e está á espera de poder facer unha radiografía que descarte a rotura.
Campionato de España de grupos de idade
O Triatlón Ferrol rematou o campionato de España da Coruña cun 16º posto de Pablo Pedrosa –na categoría de 20-24 anos-, 29º de Borja Catrufo e 41º de Ricardo Fernández -25-29-, 27º de Luis Rilo e a retirada de Gonzalo Jiménez -35-39-, 29º de Marcos Caneiro, 32º de Héctor Mera, 43º Pablo Sanjurjo e 45º de Juan Díaz, -40-44-, 30º de José María Eiroa -45-49- e 14º de Manu Pita -50-54-.
01.09.2018
Melina Alonso acadou o mellor resultado para o Triatlón Ferrol sendo a sexta mellor do campionato de España de tríatlon olímpico. Carmen Gómez rematou en top-10 sendo novena de España e Marcos Ruiz, 50º.
As internacionais do Triatlón Ferrol marcaron o ritmo desde o segmento de natación para tirar do pelotón no ciclismo. Carmen Gómez tentou unha pequena escapada nas primeiras voltas pero non tivo colaboración e os postos de privilexio xogaríanse entre unha ducia de triatletas nos 10 km finais de carreira a pé. Melina Alonso foi a primeira en apertar correndo, con Carmen Gómez de preto pero a intensa calor e o esforzo previo deixou sen forzas ás deportistas do club branquiazul para manterse en postos de medalla nos últimos quilómetros. Finalmente, Melina Alonso entrou a un minuto do bronce do campionato e como sexta española.
Pola súa banda, Ana Carvajal, rodando no grupo perseguidor, tivo que abandonar por unha picaba na bici. Deste xeito, e coa baixa de última hora de Camila Alonso por mononucleose, o Triatlón Ferrol non puido puntuar por clubs.
En categoría masculina, unha excelente natación permitiulle a Marcos Ruiz rodar no grupo perseguidor e deu a cara nunha frenética carreira a pé para ser o 51º da xeral e top-50 español para o triatleta fenés sub-23.
26.08.2018
O Triatlón Ferrol rematou a fin de semana cun pleno de clasificados para os Mundiais 2019 de Pontevedra.
No campionato de España de longa distancia en grupos de idade, Edu Saavedra marcouse unha exhibición cunha marca de 6:46:06, que lle valeu ser sétimo do campionato galego que se celebraba á vez. O triatleta local pode celebrar así a súa praza para o Mundial na categoría de 30-34 e rematar entre os mellores galegos por detrás do campión de España elite, Gustavo Rodríguez. Pola súa banda, tamén logrou a praza para o Mundial Juanchi González aínda que lamentou un erro na segunda transición. Saíu sen dorsal a correr pero, para non ser descualificado, volveu atrás máis dun quilómetro para recollelo e poder rematar.
Na xornada do domingo, Pablo Pedrosa, Ricardo Fernández, Gonzalo Jiménez, Marcos Caneiro e Manu Pita finalizaron todos o campionato galego de tríatlon cros entre os mellores da súa idade e, polo tanto, tamén certificaron o seu billete para o Mundial de grupos de idade nesa disciplina.
18.08.2018
Miriam Casillas conseguiu ser vixesimosegunda na Copa do Mundo de
Lausana despois de repoñerse de dous problemas mecánicos no ciclismo.
A pacense do Triatlón Ferrol saíu da auga preto do top-20 da proba pero xa na primeira volta do ciclismo viuse obrigada a parar por un problema no cambio da súa bicicleta. Colleu o ritmo de novo pero, a falta de poucos quilómetros para chegar á segunda transición, tivo unha picada e terminou o segmento ciclista case freada. Na carreira a pé, Miriam Casillas puido recuperar case dez posicións.
Desta forma, a triatleta de Badaxoz terminou en 22° lugar e como segunda mellor española.
09.08.2018
Camila Alonso non puido rematar o Europeo de Glasgow ao ser dobrada no ciclismo por unha cabeza de carreira na que Nicola Spirig puxo un ritmo frenético.
A canteirá do Triatlón Ferrol rematou a natación cunha ducia de triatletas que loitaron por engancharse aos pelotóns perseguidores. No caso da ferrolá, o esforzo non tivo recompensa ao ser superada polas líderes, feito que impide automaticamente rematar a proba aínda que tivese algunha opción de maquillar o resultado no sector de carreira a pé.
Camila Alonso, oitava no Europeo de relevo mixto
A ferrolá Camila Alonso logrou ser oitava coa selección española no campionato de Europa de relevo mixto.
A internacional do Triatlón Ferrol puido resarcirse da proba individual. Cuns tempos semellantes aos da súa compañeira Anna Godoy, unicamente Camila Alonso ten que lamentar terse axudado dunha rival para saír da auga, feito sancionado cunha parada na área de penalización que cumpriu Antonio Serrat na remuda definitiva.
04.08.2018
Miriam Casillas fíxose coa Copa de Europa de Malmö despois de dous meses sen competir por lesión.
Nadando no grupo das mellores, rodou nun gran pelotón ata que todo tivo que decidirse no 5.000 final a pé. A internacional do Triatlón Ferrol sorprendeuse a si mesma volvendo correr a un bo nivel tras un período de baixa e marcando o segundo mellor parcial da xornada. “Corriendo no sabía realmente cómo podía correr, salí con todo, sin miedo”, relatou a estremeña.
Cun tempo de 1:01:44, Miriam Casillas venceu con 11 segundos de vantaxe sobre a segunda, a subcampioa olímpica Lisa Norden.
A próxima cita da triatleta de Badaxoz será en dúas semanas na Copa do Mundo de Lausanne.
O canteirán do Triatlón Ferrol rematou os 1.000 de natación no quinteto de cabeza e foi o único que lle puido seguir a estela ao líder da proba, marcando o terceiro mellor parcial a pé no 5.000 final.
